ئىنتېرنېت، بالامنى قايتۇرۇپ بەر!
(ئىنتېرنېتنىڭ خەتەرلىرى ۋە ئۇنىڭدىن ساقلىنىش ئۇسۇللىرى)
بىز ھازىر ئۆزىمىز ھېس قىلمايۋاتقان تولىمۇ قورقۇنچلۇق بىر خەتەرگە دۇچ كەلمەكتىمىز. ئەمدىلەتىن كىشىلەرنىڭ دىققىتىنى تارتىپ، چۆچۈتۈشكە باشلىغان بۇ خەتەر بالىلارنى ۋە ياشلارنى رەھىمسىزلەرچە تارتىپ كېتىۋاتقان تېگى يوق ھاڭغا ئوخشايدۇ. خۇددى پەرۋانە ئۆزىنى ئوتقا ئاتقىنىغا ئوخشاش، بۇ ھاڭغا ئۆزىنى ئېتىۋاتقان بىچارە پەرزەنتلىرىمىزنى قۇتقۇزۇپ قېلىش ئۈچۈن دەرھال ھەرىكەتكە ئۆتۈش ھەربىر ئاتا - ئانىنىڭ باش تارتىپ بولمايدىغان مەجبۇرىيەت ۋە مەسئۇلىيىتىدۇر.
ناۋادا سىزنىڭ پەرزەنتىڭىز ھەققىدە «بالام دەرس ئۆگەنگىلى ئۇنىمايۋاتىدۇ»، «ھۇرۇنلۇق قىلىۋاتىدۇ»، «مىجەزى قوپال، شۇ سەۋەبلىك باشقىلار بىلەن مۇناسىۋىتى ياخشى ئەمەس»، «ناچار بالىلار بىلەن دوست بولىدۇ»، «ئۆيگە ۋاقتىدا كەلمەيدۇ»، «ھۇجرىسىغا بېكىنىۋېلىپ، سائەتلەپ ئولتۇرۇۋالىدۇ»، «دوستلىرى بىلەن بولغان مۇناسىۋەتلىرى ئۈزۈلدى»، «زەھەرلىك چېكىملىك چېكىۋاتقان بولۇشى مۇمكىن»... دېگەندەك شىكايەتلىرىڭىز ياكى گۇمانلىرىڭىز بولسا، قىلچە ئىككىلەنمەي بۇ يامانلىقلارنىڭ مەنبەسىنى ئىنتېرنېت تورىدىن دەپ بىلىڭ!
پەرزەنتلىرىمىزگە ۋە ئائىلىمىزگە بارلىق يامانلىقنىڭ ئىشىكىنى كەڭ ئېچىپ بېرىۋاتقان بۇ خەتەر ھازىر ئۆيىمىزدە ھەتتا يانچۇقلىرىمىزدىلا تۇرماقتا. شۇنى كېسىپ ئېيتالايمىزكى، پەرزەنتىڭىزنىڭ يانچۇقىدا پىلتىسىگە ئوت تۇتاشتۇرۇلغان بىر بومبا بولسا، ئۇنىڭ پارتلاپ كەتمەسلىكى ئۈچۈن سىز ھەرقانداق بەدەل تۆلەشتىن يانمايسىز، ئەلۋەتتە. ئۇنداقتا، بۇ بومبىنىڭ پىلتىسىدىكى ئوتنى قانداق ئۆچۈرىمىز؟ بىز بۇ كىتابتا، ئۆز ئىختىيارلىقىمىز بىلەن ئۆيىمىزدە ۋە يانچۇقىمىزدا ئېلىپ يۈرۈۋاتقان بۇ خەتەردىن قۇتۇلۇشنىڭ يوللىرىنى مۇھاكىمە قىلىمىز.
شۇنداقتىمۇ، سىلەرگە بىر خۇش خەۋەر بېرەيكى، بۇ سەۋەبلىك ئۇنچىۋالا ئۈمىدسىزلىنىپ كېتىشىڭىزنىڭ ھاجىتى يوق. بىز بۇ كىتابتا پەرزەنتلىرىمىزنى مەزكۇر خەتەردىن قوغداپ قېلىشنىڭ چارە - ئاماللىرىنى تونۇشتۇرۇپ چىقىمىز.
شۇنى كېسىپ ئېيتالايمىزكى، بۇ كىتابتىكى تەدبىرلەرنى ئوقۇپ چىقىپ، تەتبىقلاش پەرزەنتلىرىڭىزنى يۇقىرىدا بايان قىلىنغان خەتەردىن ساقلاپ قېلىشتىكى ئەڭ مۇۋاپىق ۋە ئۈنۈملۈك ئۇسۇل ھېسابلىنىدۇ.
يەنە شۇنداق دېيەلەيمىزكى، بۇ كىتاب ئىنتېرنېتنىڭ قورقۇنچلۇق پاتقىقىغا پېتىپ قالغان سەبىي پەرزەنتلىرىڭىزنى قۇتقۇزۇپ قېلىشتا، سىزگە ۋە پەرزەنتلىرىڭىزگە سۇنۇلغان «قۇتقۇزغۇچى قول» بولالايدۇ.