ئابدۇللەتىف داموللام ۋەتىنىمىزنىڭ تۇرپان شەھىرىدە تەخمىنەن 1880 - يىللىرى ئەتراپىدا تۇغۇلغان بولۇپ، 27 يېشىدا ھىندىستانغا چىقىپ ، 15 يىل ئەتراپىدا ئىلىم تەھسىل قىلغاندىن كېيىن ھىندىستاندا قېلىپ 40 يىل ئىماملىق ۋە تەلىم - تەربىيە بىلەن شۇغۇللانغان، ئۇنىڭدىن كېيىن سەئۇدى ئەرەبىستانغا يەرلىشىپ ئون يىلدىن كېيىن ۋاپات تاپقان. داموللامنىڭ مەزكۇر تەپسىردە ”بەزى دوستلىرىمنىڭ: «قىسقا - قىسقا سۈرىلەرنىڭ تەرجىمە - تەپسىرى بولغان بولسا...» دېگەن ئىلتىجالىرى بىلەن ھىجرىيە 1385 - يىل رەبىئۇلئەۋۋەل ئېيىنىڭ 20 - كۈنى (مىلادى 1965 - يىل 7 - ئاينىڭ 19 - كۈنى) پەيشەنبىدىن باشلاپ ئۇشبۇ تەرجىمىنى تەپسىرى بىلەن قوشۇپ يېزىشقا باشلىدىم“ دېگىنىگە قارىغاندا بۇ تەپسىرنى ئۆمرىنىڭ ئاخىرقى باسقۇچلىرىدا سەئۇدى ئەرەبىستاندا يازغانلىقى مەلۇم بولىدۇ. بۇنىڭغا ئاساسەن داموللامنىڭ تەخمىنەن 92 ياش ئەتراپىدا 1970 - يىللىرىنىڭ ئالدى - كەينىدە ۋاپات بولغانلىقى ئېھتىمالغا يېقىن. ئۇنىڭدىن باشقا مۇئەللىپنىڭ 30 - پارىنى تولۇق تەپسىرلىگەنلىكى ھەققىدە مەلۇمات بولسىمۇ، لېكىن بۇ ئەسەرنى نەشرگە تەييارلاۋاتقان مۇشۇ دەمگىچە قولىمىزغا يەتكەن قىسمى نەبەئ سۈرىسىدىن ئىنشىقاق سۈرىسىگىچە بولدى.
ئۆزىنى دىنغا خىزمەت قىلىشقا ئاتىغان داموللامنىڭ ھاياتى ۋەتەنسىزلىك ۋە جاپا - مۇشەققەتلەرگە تولغان بولسىمۇ، ئىلىمگە بولغان مۇھەببىتى ۋە دىن خىزمىتىنى قىلىشتىكى ئىرادىسى ئاجىزلىشىپ قالمىغان. ئۆمرىنىڭ ئاخىرىقى باسقۇچلىرىدا ياشىنىپ قالغان بولسىمۇ ئۆز دىنى ۋە مىللىتى ئۈچۈن تەپسىر يېزىشقا كىرىشكەنلىكى بۇنىڭ دەلىلىدۇر ۋە ھۆرمەتكە شاياندۇر.
ئاللاھتىن داموللامنىڭ تەقسىراتىنى ئەپۇ قىلىشىنى، ئاستىدىن ئۆستەڭلەر ئېقىپ تۇرىدىغان نازۇ - نېمەتلىك جەننەتلەرگە نائىل قىلىشىنى تىلەيمىز.
— نەشرگە تەييارلىغۇچىدىن.

Yazar	داموللا ئابدۇللەتىف مۇھەممەد قۇربان تۇرفانىي
Sayfa adedi	236
Çeviren	ھۈسەيىن تاش
Kapak	Sert
Yayın Tarihi	2025
Yayınevi	Ewlat Neşriyat