پەرزەنتلىرىمىز كەلگۈسىنىڭ ئۈمىد غۇنچىلىرى ۋە ئەجدادلارنىڭ ئىزباسارلىرىدۇر. ئۇلار ئاتا – ئانىلاردىكى ساغلام ئىمان - ئېتىقاد، سالىھ ئەمەل، گۈزەل ئەخلاق، توغرا پىكىر، ياخشى ئۆرپ – ئادەت، ۋەتەن مۇھەببىتى، ئانا تىل سۆيگۈسى قاتارلىق بىر مىللەتنىڭ مەۋجۇتلۇق كاپالىتى ھەم دۇنيا - ئاخىرەتلىك سائادىتى بولغان قىممەت قاراشلارنى كېيىنكى نەسىللەرگە توشۇغۇچىلاردۇر. لېكىن، تولىمۇ ئەپسۇس، ئاتېزىم، ئىلمانىزىم، فېمىنىزىم قاتارلىق تۈرلۈك بۇزۇق ئىدىيەلەر يامراۋاتقان بۇ دەۋىردە بارلىق ئاتا – ئانىلارنىڭ بېشىنى قاتۇرۇۋاتقان ئەڭ مۇھىم مەسىلىلەردىن بىرى يەنىلا سالىھ مۇسۇلمان پەرزەنت تەربىيەلەشنىڭ قىيىنلىشىپ كېتىشى ئىكەنلىكى كۆز يۇمغىلى بولمايدىغان ئاچچىق رېئاللىققا ئايلىنىپ قالدى.
«پەرزەنت تەربىيەسىدىكى يېڭى توسالغۇلار» ناملىق بۇ كىتاب سىزنىڭ پەرزەنتلىرىڭىزنى تەربىيەلەش جەريانىدا يولۇققان تۈرلۈك توسالغۇلارنى بىر تەرەپ قىلىشىڭىزغا ئۈنۈملۈك ياردەم بېرىدۇ.
بۇ كىتابنىڭ ئالاھىدىلىكلىرىدىن بىرى شۇكى، ئۇ ئىسلام دىنىنىڭ تەربىيە پىرىنسىپلىرى بىلەن رېئاللىقنى بىرلەشتۈرۈش ئارقىلىق، سىزنى قۇرئان كەرىم ۋە پەيغەمبەر ئەلەيھىسسالامنىڭ سۈننىتىگە تايانغان تەربىيە يوليورۇقلىرى ۋە قوللىنىشچان ئۇسۇللار بىلەن تەمىنلەيدۇ.
بۇ كىتابتا پەرزەنتلەرگە سەلبىي تەسىر كۆرسىتىدىغان ھەر خىل ناچار ئامىللار، بولۇپمۇ زامانىۋى جەمئىيەتتىكى پەن - تېخنىكا ۋاسىتىلىرىنىڭ تەسىرى، ئۇلارغا توغرا يېتەكچىلىك قىلىش ئۇسۇللىرى ئوتتۇرىغا قويۇلغان. شۇنداقلا ئاتا-ئانىلارنىڭ پەرزەنتلەردە مۇستەقىل ئىدىيە، ئېتىقاد ۋە ئەخلاق قارىشىنى يېتىلدۈرۈش، ئېسىل ئەخلاقىي پەزىلەتلەرنى شەكىللەندۈرۈشتىكى رولى ۋە ئۇسۇللىرى ھەققىدە تەپسىلىي توختالغان.
بىز بۇ كىتابنى پەرزەنت تەربىيەسىدە قىيىنچىلىققا دۇچ كېلىۋاتقان ھەر بىر ئاتا - ئانىغا تەۋسىيە قىلىمىز.